Sar phiravas andre škola

Phenďa mange miri daj: "Mušines andre škola te phirel, bo tre dades zaphandena." Samas khere pandž čhave, štar čhaja, jekh murš. Jekhphureder sas e phen, avka me, so somas jekh berš pal late. Ale me somas zoraleder sar oj. The bengeder. Ta e daj phenďa: "Andre škola phireha tu, bo khere ča bida keres." E phen, kaj ačhela khere paš o ciknore. Hordinlas len pro dumo, o pherne rajbinlas, khoskerlas lenge o ľima, o buľora, šulavelas, pratinlas. Savoro kerlas odi čhaj, so sas khere, bo o daja džanas andro gav pal o gadže te kerel, avenas khere ča raťi. The amari daj džalas. O dad phirelas cehli te kerel. Te na sas buťi, kerlas le gadženge vaš o chaben. Bare samas čore.

Tosara man e daj uštad'a: "Ušti upre, Barešereskeri, dža kije len, mor tut." Vaj tranda metri amare kherestar džalas leňori. Odoj amen phirahas amen te morel. Sako tosara, raťi tiž. Raťi denašavas kije len pro duj pindre, aľe sar džavas pale, ta chuťavas pre jekh pindro. Šoha man na sas topanki, ta kamavas, kaj man choča jekh pindro te ačhel žužo. Pindrange phirahas jevende ňila. Pre mande man has ča jekh viganocis, so e daj mangľa gadžatar. E gaťica, o teluno gadoro? Ta kaj! Na džanahs, hoj s'oda hin.

Gejľom kije len, mord'om o pindre, o muj. Andro bala mande has pora, bo romano vad'os sas pora phusa, so pen ispidenas avri andal o štruzľakos the andal e puraňi, melaľi duchna. Gejľom andre škola. Taška man na sas, kňižki man na sas, tužka, irka - ňič! Soha man kajso ková na sas.

Džavas gaveha, o gav inke sovlas. Avri na sas ňiko, ča duj trin gadže džanas pre maľa le grenca. Ňiko pre ma aňi na dikhľa, sar te na uľomas odoj. Džanavas, kaj e škola sas, bo sar phiravas la daha andro gav, e daj phenlas: "Adaj phireha andre škola, ela man tutar smirom Barešereskeri!"

Phares phundraďom e phari kapura. Sas rat, šil, me somas nangi pindrangi. Ňiko raz adaj na sas. Ča jekh phuro gadžo, dikhel pre mande, phenel: "So adaj kames?"

"Ta me avľom andre škola. Kamav te sikhľoľ."

"Tu?" diňa te asal. Dičha kodi rokľa pre late! Soške tut na mord'al? Soške na uchanďal o bala? Kaj tut e taška? Ňič tut nane, aňi taška tut nane, sar sikhľoha?"

"Me sikhľuvá! Me mang' adaj phirava andre škola!"

     O phuro asalas, ispidňa man andre jekh trjeda. Bešťom andre angluňi lavica. Dikhľom khatar mande. Somas korkori. Korkorori. O phuro gadžo chudňa te šulavel o dili. Me bešavas, gondoľinavas mange, hoj mandar ela vareko! Džanava sovoro. Paťavas, hoj oda sa džaniben mange avela andro šero ča avka, ča te bešava andre škola. Ale sar zadikhľom pre mire nange pindre, o jilo andre mande čhinďiľa. Šaj čora romaňa čhajoratar ačhel vareko? Korarďom andre o jakha, dikhľom man - ružova baršoňika gada pre mande, avriside somnakune ruženca. Pale paťavas, hoj mandar ela goďaver manušňi, hoj me phundravava o drom the avre Romenge. Imar čhajorake džanavas, hoj amen o Roma sam jekhpaluneder savorendar. Ňiko amenge na phenďa lačho lav. Te kamľom te džal avri andal o pero, phenlas mange mri daj: "Te na tromas andro gav te džal! O raklore tut marena." Ta tromanďiľom te džal andro gav ča akor, sar samas buter, sar amenca džanas o bareder čhave, so amen le ciknen zaačhenas.

Sas efta the jepaš, harangozinenas andre khangeri. Andre miri trjeda avenas jekh pal aver o rakle o rakľijora. Anenas len lengere daja. Duj trin daja avle andre trjeda, thode pengere rakľijoren andre angluňi lavka te bešel. Dikhenas pre ma banges. Aľe me ačhiľom te bešel andre angluňi lavka, kamavas te avel goďaver. Ča užaravas, kana avá goďaver. E učiteľka n' avelas u n'avelas. Furt ča mek rakle rakľora avenas andre. Rajkanes urde sas, savoren sas taški, le rakľijoren sas pantľiki andro bala.

Ajci ajci e učiteľka avľa. Dikhľa man andre angluňi lavica. "Ko tut thoďa arde te bešel?“ Cirdňa man avri andal e lavica, bičhaďa man te bešel palalal. "Kodoj ela tiro than." Andro anglune lavici bešľarďa barvale gadžengere rakloren. Avka bešenas o čoreder, jekhpaluneder lavica sas le Romengeri. "Cigansko." Paš e phagľi blaka, avrether savorendar. Šunavas man sar širota. Soske som adaj te bešel korkori? Phares mange sas, hoj manca na sas aňi jekh romano čhavoro, the daravas. Šunďomas man zoraleder, te paš ma vareko bešťahas. Ale somas korkori, korkorori.

Pregejľa peršo ďives andre škola. Na sikhľiľom ňič. Ňič džaniben mange n' avľa andro šero, ča koda pes mange ispidňa andre goďi, hoj savi som čori. Sar avľom khere, ňiko mandar na phučľa: ta sar sas andre škola? "Mamo, e sikhľarďi phenďa, hoj mange kampel kňižka, irka the blavajzis." E daj man pekľa: "Džas adarig! Nane vaš soske maro te cinel u tu mandar manges kňižka! Ča odoj phir, kaj amenge le dades andre te na phanden."

Aver tosara pale morďom o pindre, uchanďom man, urďom miro purano viganocis, gejľom andre škola. Avka phiravas andre škola sako ďives. Predžalas o čhona, e sikhľarďi mandar na phučľa ňič, Ča dikhelas, či som odoj. Na džanelas, hoj šunav, so phenel. Sar akharďa avri raklores vaj rakľora, andro voďi vakeravas lenca, so kampelas te phenel. Rado ginavas. Nasobilka eftakri sas miri kamaduňi. Raťi na somas hodno te zasovel, andro šero mange khelelas e nasobilka eftakri. Hazdňom opre o vast, e sikhľarďi man akharďa avri: "Chude, gin!" Igen šukares ginavas. E sikhľarďi inke phučl'a: "So bararen andre Ungriko?" Me džanavas. O papriki, o duduma.

"Tu na sal diliňi," phenel e sikhľarďi. "Te tut ulahas genďi, irka, blavajzis, šaj sikhľiľalas vareso. Soske tuke e daj na cinel genďi?"

"Mira da nane love."

"Soske phires ajsi melaľi? Aňi renti pre tute nane!"

"Amen sam khere butdžene, nane buťi."

Paľis jekh ďives n 'avľom andre škola. "Kaj salas?" phučľa e sikhľarďi sar imar avľom.

"Tu mange phenďal, hoj mange o viganos melalo, ta mange les e daj rajbinďa." E sikhľarďi diňa avri o jakha. "Našťi džás avri andal o kher, medig mange o viganocis na šuťiľa."

Paľis mange e sikhľarďi cinďa irka a delas mange ajse cikne blavajzici, so len aver čhave imar čhide. Dukhanas man o angušťa sar len chudavas, ale somas rado, hoj man hin.

Jekhvar sas dino upral, hoj savore "cigánske" čhave mušinen andre škola te phirel. O gavutno čhibalo avka phenďa. Maškar o Roma sas bari dar, bari traš. Denaškernas upre tele, o romňija čhingernas o bala, so amenca kerna? So amenca kerna? O gavutno sluhas avľa andro romano pero, chudňa te bubňinel, o Roma našte avri andal o koľibi, nange, o bala žuže pora, o romňija vriskinenas pro čhave: "Dža andre škola! Phandena tuke le dades, te na džaha! Ko amen ľikerela?"

O čhave džanas. Sako pre peste urďa "feder" renti. La dakeri rokľa, le dadeskeri cholov - džahas andre škola. O gavutno sluhas pre bicigľa, tradelas amen angla peste. "Noča, džan, denašen, bando cigánska!"

     Anďa amen ko rjaďiťeľis. Šoha inke le rjaďiteľis na dikhľom. Sas cikno, pervalo, nango šero. O jakha sar puruma, bare čhora, sar delas duma, o čhora leske chuťkernas upral o vušt. Na sas les ča duj danda anglal. O Del džanel, kaj gejle o aver danda. Sar amen dikhľa, diňa avri o bare jakha. Chudňa amenge te rakinel, hoj sam khandune Roma, hoj na kamas te sikhľol, hoj na kamas manušenge te ačhel! Koškerlas amen, ale dičholas pre leste, hoj hino lačho. "Sar me tumen rozthovava? Banda melaľi! Savore sikhľarde tumendar daran," phenďa šukares. Avka chudňa te ginel: jekh, duj, trin, štar, pandž. Samas dešupandž džene. Phenďa: "Tu džaha kodoj, tu kodoj, tu kodoj!" Avka amen rozthovkerďa pal o trjedi. E phen, so jekhe beršeha phureder sas mandar, e Beži, gejľa tiž andre škola. E daj koškerlas, rovelas, hoj nane ko paš o čhave te ačhel. kana oj džal andre buťi.

Avľam andre trjeda, e sikhľarďi amender daranďila. "Kaj tumen thová!" Palalal sas trin lavici. Kodoj amen thoďa te bešel. Samas avrether le raklendar, kaj pes lenca te na maras. Na samas hodno te sikhľol.

     Jekhvar bari bokhaľi somas. Akurat sas kermešis andro gav. O gadžija pekenas, tavenas - o Roma bokhaľonas. E sikhľarďi phučelas savorendar, ko so chaľa. The le romane čhavendar. E Kaľi Piri phenďa: "Me idžestar na chaľom ňič. Amen chás ča akor, sar e daj avel andal o gav.

O Bango phenďa: "Aňi amen tosara na chás." Kada sas čačo. Perše amen chahas palodilos, sar amare daja avle andal o gav, ande bandurki, ciral, thud, so e gadži delas vašoda kaj pharade o kašta, čhide avri o ganajos andal e stajňa, makhle avri o bov.

E sikhľard'i avľa ke mande: "Tu so chaľal?"

"Jaj!" mange o jakha buchľile sar čercheňa. "Te dikhľanas, so me chaľom! Pišota ciraleha, zumin, bokeľa, gule...!"

"Saroda, kaj tu chaľal a tira pheňa na sas so andro muj te thovel?" e sikhľarďi čhind'a miri šukar duma. "Soske chochaves? Čhiv avri e čhib! Chudeha, kaj masovar te na chochaves."

Čhiďom avri e čhib, čhind'a man pal e čhib pravitkoha. Bares man dukhalas, na somas hodno duma te del. Sar imar avľom ke peste, phenďom lake: "Me na chochavav! Calo rat chavas! Džavas sune chabnenca, sunende chavas!"

E sikhľarďi loľiľa, na phenďa ňič, gejľa.

Pregejľa jekh berš. Sako phenelas, hoj na som diliňi. Na prepejľom. Mukhle man te džal andre dujto trjeda. Chudňom školakero ľil, aňi jekh trin pre leste na sas. A me somas bari barikaňi! Denašás khere, chuťkerás andre loš, imar dural vičinavas: "Mamo, hin man ča jekha the duja!"

"Me tut dá, jekha! Pal tire jekha sar dživaha? Jekha, jekha - khere tut chude buťatar! Khere pre buťi čhandes." Mukhľa man avka. Mange sas kada pharo. O raklore resenas genďa, orici, love te ande lačhe školakere ľila - so resťom me? Koškeriben. Na sas man kaske avri te phenel miro jilo.

Andre dujto trjeda manca avle mek trin romane čhavore. Ačhiľom kamaratka kole muršorenca, o Roma pal ma phenenas, hoj som gorender sar murš! So o muršora phende, phenavas the me, so kemas, keravas the me. Te marďonas, marďuvavas the me.

Jekhvar avľa o cirkusis andro gav. Me merás pal o kheľiben. Džanavas te thovel o pindro pal e men. Phende avka o Šulo, o Bango, o Tarzaňis - avka bučhonas ola trin, so manca phirenas andre dujto trjeda: "Šun, tu džaha andro cirkusis - a tu, so odoj dikheha, paľis amenge sa sikhaveha!"

Phenav: "Sar džava, te amen nane love?"

A jon phende: "Ma dara, o love imar varesar stradaha. Av amenca."

Gejľam kije khangeri. Angle khangeri sas le svato Janoskeri socha. Tosara, kana o gadže phirenas khatar e khangeri, čhivenas leske love. O Šulo phenel: "Soske la sochake love? Tu ča merkineha, či na avel o rašaj abo kostelňikos, amen kidaha avri o love." Rozkerde čik sajenca, čhungarenca, kerde kajsi astarďi kaša, thode pre raňori, e raňigori preispidne perdal o mreži kijo svato Janos. Kamenas o love te astarel upre. "Bangeja, muter, muter pre čik, ela feder!" phenel o Šulo. Čačo, jekh flľeris astarďiľa pre raňik. O rašaj avel!

"O rašaj avel!" vičinav. O čhave mange thode o fiľeris andro muj. "Ligin! Nakhav tele!" Nakhaďom, chudňom te tašľol. Tašľuvás, khasás, čhungarás, sa skaliľom, o čhave man pekenas pal e men.

"So adaj keren bengale!" phenel o rašaj.

"Avľam te modľinel pes kijo svato Janos - dičha, joj mišto na tašľil'a!" chochavlas o Bango.

Bizo, o rašaj na džanelas, kaj tašľuvás andro čorachane love, phenda: "Av arde, čhivá tuke čino svecimen paňi!" Čhorďa mange andro burňika, avka o čorachane love zapijľom svecimen paňeha.

O Bango phenel: "Mušinas aver te kerel, kaj o love te strádas." Sar? So? Kaj? Me phiravas te kerel ke jekh gadžo, sas les kachňa. "Džanes so," phende o čhave, "džaha andro kurňikos, kideha le kachňendar o jandre, andal e bul. Bikenaha le Čhindeske."

Me na džanavas koda te kerel. "Bangeja, dža tu!"

"Mišto," phende o čhave. "Tu džaha pro kašt, pre ambroľin, čhingereha o ambroľa, o Bango džala te kidel o jandre."

Gejľom upre pre ambroľin - o rikono na bašolas, džanelas man. O čhave sas andro kurňikos, o kachňa na vičinenas, bo o Šulo, o Bango džanenas sar te kerel.

Ko avel ko na - o gadžo! Me pro kašt! O gadžo prosto ke mande. "Ta tu mange kavka paľikeres vašoda, kaj tut dáv buťi?" O gadžo chudňa baro cilo, so leha maren tele o akhora, de pre mande! Me ča dikhavas, či o Bango le Šuleha denašte andal o kurňikos. Dikhav, kaj chuťile perdal e kapura, imar nane. O gadžo len na dikhľa. Mišto, akana šaj avav tele pal o kašt. Chuťiľom - prosto pro karfin. Mek pr´oja bacht les na demaďom andro pindro, ča e rokla pharaďom. Palal.

     Prastav, e čhingerďi rokla denašel andre balvaj, miri nangi bul blišťisaľol sar o čhonoro.

O čhave pre ma užarenas. Visarenas man the kavka the kavka. "Kampel kotor te prisivel!" phenel o Bango. Ale savo kotor? Khatar laha?

"Džanes so," phenel o Bango, "tu džaha angla mande, me palal tute, e bul na dičhola." Avka džahas. E daj dural dikhelas. "S' oda avka aven? Dikh sar avel muršeha! Kikidlo ke late! Paťivaľi čhaj avka phirel? (Šaj mange uľa efta, ochto berš). Sar avľam pašeder, phenel e daj: "Ta avka tu phires, mri čhaj?!" Marďiľom ajci, kaj našťi ušťás pal e phuv. E daj jajgatinelas: "Jekh viganocis tut sas! Tu les čhingerďal! Sar džaha andre škola?" Amen ňigda kotora na sas khere. Phenel mri daj: "Užar, varesar keraha." Kajsi leketa, so sas te phandel anglal, ta la mange palal phandľa. Nangi bul na dičholas.

So ča mange e daj priphandľa e leketa, džahas te bikenel o jandre. Phenel o Čhindo: "S' oda tumen za kachňa hin?" Bo e cipa sas saňori. "Dičhol, hoj romane kachňa!" O Čhindo amendar o jandre na cinďa.

Akana so? Sar te zarodel love, kaj te džas andro cirkusis? Me phenďom: "Jaj, mange namištes! Imar na džav ňikhaj. Džav mange khere."

"Ehe!" phende o čhave. "Ta tu chaľal o love u kames khere te džal?" O Šulo man chudňa kanestar. "Ma dara, khatar džaha visaľoha, amen pal tute, bo kada svatojansko fiľeris nane ča tiro! The amaro hino." Kajča so ole filľristar, te o cirkusoskero ľiloro molas jekh koruna u mek biš fiľeri!

"Avas džas odoj ča avka, dikhaha sar so," phenďa o Tarzaňis. Gejľom odoj, kaj o cirkusis sas. Pherdo cirkusiko verdana sas odoj. Džal o Bango te phučel, či lenge na kampel paňi te hordinel, te šegetinel dareso. Phenel oda cirkusňikos: "Ha, kampel mange pherne te rajbinel, ta te kamen, šaj rajbinen." O Bango denašelas paňeske, o Šulo rajbinlas, me odoj terďuvás sar lengeri princezna. O Bango phenel le cirkusňikoske: "Imar la mukh andre! Joj džala te dikhel o cirkusis!"

O cirkusňikos andre mande ispidňa: "Hop! Dža denaš!" Gejľom andre, o čhave rajbinenas o pherne sa het.

     Somas andro cirkusis! O akrobati hurňisaľonas pro hrazdi, phirenas pro šelo, o klauni perkemas pal o bicigľi - mange sas jekhfeder pre dzeka sapaľi džuvľi andre somnakuňi rokľica, kerelas kozimertki andro luftos, phirelas pro vasta. Andre miro voďi keravas savoro pal late. Kada sa sikhavá le čhavenge!

Avľom khere, labuvás sar čercheň. Mardiľom la datar, hoj phirav upre tele! Rovindos gejľom te sovel. Bokhaha. Sar zaphandľom o jakha, sa sunende keravas sar ola cirkusňika, chuťkerás andro luftos, phiravas pro vasta, pre mande labolas somnakuňi rokľica sar o khamoro.

Mek aňi na ďivesaľiľa, počoral ušťiľom, našľiľom andre mulaňi bar. Odoj sas bari čar, šukar, kovľi, andre čar cvičinavas, kaj man te na phagerav. Kerďom phurd. Kada džanavas te kerel. Thoďom o pindro pal e men. Probaľinďom salto te kerel. Pejľom pro dumo, fest demaďiľom. Soča man čino zbatorinďom, zumavás inke te kerel. Bonďaľiľom andro luftos. Mišto, imar the salto džanav. Jekh na somas hodno te kerel - na džanás te phirel pro vasta. Perkeravas ta perkeravas. Somas phagerďi kaľarďi. Savoro man dukhalas.

     Andre khangeri harangozinenas, me prastavas andre škola. Peršo ora sikhľuvahas katechismus. O rašaj avľa andre trjeda, phenel: "Tu salas andro cirkusis, na?" "Ha, somas."

     "Andro cirkusis phires, andre khangeri na phires!" Phenav: "Andre khangeri hin šilaľi phuv, man nane topanki." "Phen mange, sar uľiľa amaro somnakuno Deloro."   

     "Na džanav tuke te phenel, sar uľiľa o Deloro, aľe te kames, phenava tuke, sar uľíľa amari cikňi pheňori, e Iľi"

     "Maj av avri andal e lavica, reseha pre bul, bo na džanes moresis!"

     "Jaj, me našťi resav pre bul!" rovavas. O rašaj man cirdňa avri andal e lavica, e leketa phundriľa, miri nangi bul labolas sar pherdo čhon.

     O čhave chudne te asal. O rašaj man bičhaďa khere. No imar mange e daj anďa aver purano viganocis andal o gav.

     Jekhe kurkeha, sar imar na somas ajsi phagerďi, phenav le čhavenge - akurát sikhľuvahas giňiben: "Avas džas!" Hazdňom opre o vast, hoj mange kampel pro budaris. O čhave pal mande jekh pal aver. Sas amen moderno škola, bo sas budaris paňeha, trin budarici, anglal sas gangocis. Andro gangos chudňom te sikhavel o cirkusis. E sikhľarďi pes čudaľinlas, kaj hine romane čhave. Kaj gejle? Ňiko n' avelas pale andal o budaris. E sikhl'arďi gejľa pal amende. So dikhel, so na, me phirav pro vasta, bonďaľvav andro luftos, banďarav o muj sar o klaunos.

"Ta tu ajsi sal! Tu lenge cirkusi sikhavkeres! Sem užar!" Pale mardiľom. Kecivar me mardiľom angle koda jekh cirkusis! So mange sas olestar? Jekh fiľeris, so les nakhaďbm. Sar andal ma avľa avri, garuďom les andre mulaňi bar. Odoj hin parundo dži adaďives.

Avľas nevo sikhľardo. Sas učo, terno. Dikhelas pr' amende. "Oda savore romane čhavore? Buterdžene tumen na san?

"Sam buterdžene, aľe ola aver na phiren andre škola. Te uľamas buterdžene, ta amendar o sikhľarde darandehas!"

"Ta me mange lava savore romane čhavoren!" phenďa o nevo sikhľardo. "Aľe ňiko pes mange na thovela andre koda, so kerava."

Pr' aver ďives, so dikhav, so na, o nevo sikhľardo prastal pre bicigľa pre amari vatra. Avľa maškar o "cigáni". Aňi jekh gadžo maškar amende na avľa, ča o gavutno sluhas. O sikhľardo vičinelas: "Dojekh čhavoro, so hin te phirel andre škola, avri! - Aven avri!" phenďa romanes.

Prastandiľam avri andal o koľibi - o sikhľardo, o cilo leste andro vast. "Džan, džan! Siďaren andre škola!" Sar avľam andre trjeda, phučľa: "Ko pes na uchanďa? Hazden o vasta!" Na kampelas te phučel, bo dikhelas, hoj ňiko amendar na uchanďa o bala.

"Soske o bala na uchanďal?"

"Nane amen kangľi."

"Morďal tut?"

"Amen nane khoskerdo." Jekh pre avreste vičinahas, so so amen nane.

"Mišto. Tajsa avena andre škola jekha oraha sigeder! Te na, sikhavá tumen goďi!"

Pr' aver ďives čačes avľam jekha oraha sigeder. O sikhľardo amen imar užarelas. And'a khoskerde, sapuňis, lavoris, kangľa.

"Ko mek na chaľa?"

Savore vasta hazdňile. O sikhľardo bičhaďa le Banges šingorenge. Dojekheske cinďa šingoro. Paľis phenďa: "No, akana chudaha te sikhľol! Adaďives ačhena tumen savore džene the palodilos andre škola." Pro dilos amenge pale cind'a chaben. Maro margarinoha. Phučelas amendar: "So kames te ačhel, sar aveha baro?"

"Me kamás te khelel, te giľavel!" phend'om me.

Pekľa man. "Olestar na dživeha. Mušines te sikhľol, paľis šaj kheles, giľaves." Le čhaven chudelas balendar: "Tu so kames te avel?"

"Me, charťas!"

"Mišto, aveha charťas."

"Me lavutaris sar o dad."

"Oda šukar kada, aľe te genel te ľilkerel mušines te džanel!"

Rozdavkerďa amenge o blavajzi, irki, amen čačes chudňam te sikhľol.

Andro gav sas slavnosťa. O sikhľarde kidne avri lačhe žaken o basňički te phenel. Amaro sikhľardo phenďa avka: "Ča užaren, amen lenge sikhavaha, so džanas!" Phučľa mandar: "Džanes te giľavel?"

"Džanav."

"Giľav."

Giľaďom bari kamaduňi giľi, so andro filmos šunďom. Šaj mange uľa ochto berš.

"Ko tut sikhaďa?" phučľa o sikhľardo.

"Oda miro dad giľavel raťi mira dake,“  phenďom.

"Ko tumendar džavel te phenel basňička?"

"Meeeee!" vičinav. Phenďom ajsi vlastenecko basňička, so šunďom le raklorendar. O čhama mange loľonas, o jakha labonas - ačhiľa dilino pre mande.

"Mišto," phenel, "tu pheneha basňička, avka tumen savore džene bašavena the giľavena."

O čhave kidne kheral o lavuti, e bugova, so šaj. Aľe na sas pr' amende so te urel, o renti amen na sas. O sikhľardo phenďa: "Jaj Devla, me te na uľomas a so čoro! Sar šaj tumenge pomožinav? Dičha, save šukar bala tut hin! Kamehas pantľika andro balora?"

"Jaj! Bares bi kamavas!"

"Dikhen, čhavale, vašoda mušinen te sikhľol, kaj te n' aven diline! Kaj o gadže tumenca te na keren, so kamen. Te sikhľona, ela tumen feder goďi sar tumare daden. Hazdena opre o šere tumare, džanena tumenge te arakhel tumaro than maškar o aver. Sikhľon, ma dikhen pr' oda, hoj pre tumende vičinav, hoj tumen pekav pal o kan. Našťi dav avri miri choľi pre kola džene, so tumenca keren sar pataveha, ta dajekhvar dav avri miri choľi pre tumende. Jaj Devla, kana dikhav sar o raklore chan mišto na tašľon, maro žumarenca - a tumen chan bokh, ajsi choľi andre mande avel! Sar som tumenge te šegetinel? Aven lačhe, aven paťivale, kaj o raja te dikhen, hoj tumaro čoripen nane tumari doš, aľe lengeri doš!"

     Amen iľam bari solach, hoj buter n' avaha rikone, na keraha trestos, na čoraha love khatar o svato Janos, hoj sikhľuvaha.

Gejľam pre slavnosťa. Ňiko le romane čhaven na užarelas. Sas adaj raklore pengere dajenca dadenca. Bavinenas ďivadlos pal o šustros the pal e princezna.

Avľa amaro sikhľardo. Phend'a: "Akana tumenge sikhavava me mire žaken." O čhave chudne te bašavel. O phure murša pen cirdenas bajusendar, čhorendar, chuťkernas pro than, avka len cirdelas te khelel! Avka phend'om e basňička. O gadže sas diline pre mande. Paľis iľom o taňiris - o sikhľardo mange phend'a - džavas te kidel avri o love. "The amen kamas te sikhľol, aľe nane amen genďa, irki." Sako diňa love.

But andre škola na phiravas. Ačhiľa o mariben. Le Romen na mukhenas te avel andro gav. Na mukhenas amen andre škola te phirel. Avľom avri andal e trito trjeda.